İsrayıl İsgəndərov

Azərbaycan Dövlət Pedaqoji Universitetinin nəzdində Azərbaycan Dövlət Pedaqoji Kollecinin direktorudur.

“Ümid” Sosial İnkişafa Dəstək İctimai Birliyinin icraçı direktorudur

2021-ci ildən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvüdür.

İsrayıl İsgəndərov 23 iyun 1957-ci ildə Gədəbəy rayonu Samanlıq kəndində anadan olub.

1964-1974-cü illərdə Gədəbəy rayonu Samanlıq kənd orta məktəbində orta təhsil alıb.

1978-ci ildə riyaziyyat müəllimi ixtisasını, 1991-ci ildə fizika-riyaziyyat elmləri namizədi alimlik dərəcəsi alıb. 16 mart 2016-cı ildə Azərbaycan Respublikası Prezidenti yanında Ali Attestasiya Komissiyasının qərarı ilə “Menecment”  üzrə dosent elmi adını alıb.

1984-2002-ci illərdə Azərbaycan Su Problemləri Elmi-tədqiqat İnstitutunun Riyazi modelləşdirmə və Texnoloji Proseslərinin Avtomatik İdarəedilməsi şöbəsinin kiçik elmi işçisi, böyük elmi işçisi və bu şöbənin “Su təsərrüfatının iqtisadiyyatı” bölməsinin rəhbəri vəzifələrində çalışıb. 1995-1997-ci illərdə Azərbaycan Respublikası Beynəlxalq Humanitar və Texniki yardım üzrə Respublika Komissiyasının Nazirlər Kabineti strukturundakı İşçi Qrupunun böyük referenti vəzifəsini icra edib.

1997-ci ildən “Ümid-98” Humanitar və Sosial Dayaq Mərkəzinin (indiki adı “Ümid” Sosial İnkişafa Dəstək İctimai Birliyi) təsisçisi və icraçı direktorudur. Tərəfindən idarə olunan “Ümid” qeyri-hökumət təşkilatı GRINGO-nun (Qaçqın və məcburi köçkünlərlə işləyən QHT-lərin Qafqaz Şəbəkəsi) maliyyə agenti olub, icra etdiyi layihələrdən biri (“Bakı-Tbilisi-Ceyhan/Cənubi Qafqaz Boru Kəməri boyu İçməyə yararlı Sudan İstifadənin Təkmilləşdirilməsi” layihəsi) “Dayanıqlılıq üzrə Beynəlxalq Mükafat” - “Energy Globe 2007”-nin milli qalibidir.

Beynəlxalq Neft-Qaz Sənayesi üzrə Ətraf Mühitin Mühafizəsi Assosiasiyasının (IPIECA) Sosial Məsuliyyətlilik İşçi Qrupunun üzvü, Dünya Bankı və Azərbaycan Hökuməti tərəfindən maliyyələşmiş Azərbaycan Kənd İnvestisiya Proqramı üzrə İcma İnkişafı Eksperti olmuşdur. Onun ekspertliyi ilə Azərbaycanda fəaliyyət göstərən iki beynəlxalq proqramın icra auditi aparılmışdır: Acción contra el Hambre (ACH) və UNICEF. Həmçinin, Korporativ Sosial Məsuliyyət üzrə ekspertdir və Azərbaycanda Korporativ Sosial Məsuliyyət üzrə ilk tövsiyə sənədinin müəllifidir.

Təhsildə müasir çağırışlar (Bakı 2022), Yaşlıların təhsili və ömür boyu təhsil (Riqa 2019), Təhsildən işə(Vyana, 2016), Qafqazda təhsil təşəbbüsü (İstanbul, Vyana 2011-2012), Detallı planlaşdırma (Kiyev, 2010), Sosial İnvestisiya (Madrid, İyun, 2008),  “Dünyada savadlılığın dəstəklənməsi” üzrə YUNESKO-nun Regional konfransı (Bakı, 2008), Avropa Parlamentinin Davamlılıq üzrə dünya mükafatı  olan “Enerji Qlobusu-2007” müsabiqəsinin yekun konfransı (Bürüssel, 2008), “İştiraklı Monitorinq və Qiymətləndirmə Prosesinin İdarəedilməsi” INTRAC, Oksford 2003), Yoxsulluğun azaldılması (Moskva, 2000) və s. konfrans və təlimlərdə iştirak edib.

İsrayıl İsgəndərov 2011-2013-cü illərdə Azərbaycan Turizm İnstitutunda (hazırki adı Azərbaycan Turizm və Menecment Universiteti) Menecment və Marketinq kafedrasının, 2013-2018-ci illərdə isə “Menecment” kafedrasının rəhbəri kimi çalışıb. Onun rəhbərliyi altında yeni yaranmış “Menecment” kafedrasının professor-müəllim heyəti formalaşmış, tədris planları, proqramları və tədris materialları zənginləşdirilmiş, kafedrada 10-dan artıq dərs vəsaiti və metodik vəsait hazırlanmışdır.

İsrayıl İsgəndərov sosial münasibətlər və menecment üzrə  analitik və tədqiqatçıdır, korporativ sosial məsuliyyət, təşkilati davranış üzrə ekspertdir. O, bakalavr təhsili üçün “Təşkilati Davranış və İdarəetmə Psixologiyası”, “Korporativ Sosial Məsuliyyət”, “İnsan resursları”, “Menecmentin əsasları” fənləri üzrə tədris proqramı və dərsliklərinin,  “Vətəndaş cəmiyyətinin inkişafında icma menecmentinin (inkişafının) rolu”,  “Təşkilat və onun cəmiyyətin inkişafında rolu”, “Qeyri-hökumət təşkilatlarının menecmenti” adlı metodik vəsaitlərin müəllifi, Stiven P. Robbins (San Dieqo Universiteti, Meri Koulter (Missuri Dövlət Universiteti), Devid A. Desenzo (Sahilyanı Carolina Universiteti) birgə müəllifliyi ilə nəşr olunmuş “Menecmentin əsasları” kitabının Azərbaycan dilinə tərcüməsinin elmi redaktorudur. 

İsrayıl İsgəndərov müxtəlif illərdə Azərbaycan Dövlət İqtisad Universitetinin, Qərbi Kaspi Universitetinin, Xarici Dillər Universitetinin  Akkreditasiya komissiyalarının üzvü, Azərbaycan Əmək və Sosial Münasibətlər Akademiyasında, Azərbaycan Dövlət Mədəniyyət və İncəsənət Universitetlərində isə Akkreditasiya komissiyasının sədri olmuşdur.

2018-ci ilin iyul-noyabr müddətində Azərbaycan Dövlət Pedaqoji Universitetində “Davamlı Təhsil və Təlim” şöbəsinin rəhbəri, 22 noyabr 2018-ci ildən Azərbaycan Dövlət Pedaqoji Universitetinin nəzdində Azərbaycan Dövlət Pedaqoji Kollecinə direktor vəzifəsinə təyin olunmuşdur. Azərbaycan Respublikası Prezidentinin 28 aprel 2021-ci il tarixli 2609 saylı Sərəncamı ilə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü təyin edilmişdir.

Azərbaycan Vətəndəş Cəmiyətinin inkişafına görə Hökumət-Vətəndaş Cəmiyyəti Dialoqu Platforması tərəfindən “Fəxri Fərman” (2017-ci il), təhsilin inkişafındakı xidmətlərinə və təhsil sahəsində yüksək nailiyyətlərə görə "Azərbaycan Respublikasının qabaqcıl təhsil işçisi" döş nişanı (AR TN-nin 29.12.2021-ci il tarixli 1535 saylı əmri) və Azərbaycan Respublikasının Prezidenti 2019-cu il 27 may tarixli 1205 nömrəli Sərancamı ilə “Azərbaycan Xalq Cümhuriyyətinin 100 illiyi (1918-2018)” yubiley medalı (Vəsiqə No I-391) ilə təltif edilib.