GR-DEM üzvü olan səfirlərdən ibarət nümayəndə heyəti QHT Agentliyində olublar.

Avropa Şurası (AŞ) Nümayəndələr Komitəsinin (NK) Demokratiya üzrə məruzəçilər qrupunun (GR-DEM) sədri, İsveçin AŞ yanında daimi nümayəndəsi Martin Ehnberqin başçılığı altında GR-DEM üzvü olan bir qrup səfirlərdən ibarət nümayəndə heyəti ilə QHT Agentliyində görüş keçirilib.

Keçirilən görüşdə Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva, nümayəndə heyətinin rəhbəri, GR-DEM sədri, İsveçin Avropa Şurası yanında daimi nümayəndəsi Martin Ehnberq, Finlandiyanın AŞ yanında daimi nümayəndəsi, Avropa Şurası Nümayəndələr Komitəsinin (AŞ NK) İnsan hüquqları üzrə məruzəçi qrupunun sədri Nina Nordstrom, Estoniyanın AŞ yanında daimi nümayəndəsi, AŞ NK-nın İnformasiya siyasəti üzrə tematik əlaqələndiricisi  Rasmus Lumi, Türkiyənin AŞ yanında daimi nümayəndəsi Kan Esener, GR-DEM-in katibi Deni Bribosiya, AŞ katibliyinin  Proqramlar üzrə Baş Direktorluğunun Azərbaycan üzrə məsul əməkdaşı Olqa Frayşteter, Azərbaycan Respublikasının AŞ yanında daimi nümayəndəsi Fəxrəddin İsmayılov, XİN-in əməkdaşı Leyla Həsənova, Agentliyin icraçı direktor müavini Emil Çaparlı, Agentliyin Layihələr Departamentinin müdiri Elnur Bağırlı, Beynəlxalq əlaqələr üzrə məsul şəxsi Toğrul Məmmədli, Mətbuat üzrə məsul şəxsi Leyla Rəhimova iştirak ediblər.

Görüşü giriş nitqi ilə açan icraçı direktor Aygün Əliyeva Agentliyin fəaliyyəti və gələcək hədəfləri barədə qonaqlara məlumat verib. A.Əliyeva bildirib ki, ötən il Azərbaycanın Avropa Şurasına üzv olmasının 20 illiyini qeyd edən ölkəmiz bu dövr ərzində bir çox konvensiyalara qoşulub, 2014-cü ildə Avropa Şurası Nazirlər Komitəsinə uğurla sədrlik edib, demokratik inkişafı dəstəkləyən mühüm layihələr həyata keçirilib. İcraçı direktor bildirib ki, 2022-2025-ci illər üzrə hazırlanaraq qəbul olunmuş yeni birgə Fəaliyyət Planının əsas istiqamətlərindən biri də vətəndaş cəmiyyətinin inkişafıdır. Məhz bizim Agentliyin yaradılması fəlsəfəsində ölkənin vətəndaş cəmiyyəti institutlarının inkişafı və onların Azərbaycanda rahat və şəffaf fəaliyyətinin qurulmasını təmin etmək durur.

Sonra çıxış edən Martin Ehnberq öncə səmimi qəbula görə təşəkkürünü  bildirib. Eyni zamanda əlavə edib ki, AŞ katibliyinin Proqramlar üzrə Baş Direktorluğu  tərəfindən təşkil edilən bu cür səfərlərin əsas məqsədi aidiyyəti üzv dövlətdə AŞ-nin Fəaliyyət Planının (FP) icrası ilə yerində tanış olmaq və bu sahədə yenilikləri öyrənməkdir. Martin Ehnberq onu da qeyd edib ki, Azərbaycanda QHT-lərin bütün sahələrdə fəaliyyətinə Agentliyin verdiyi dəstək onlar tərəfindən yüksək qiymətləndirilir. Bundan sonra da QHT-nin fəaliyyət istiqamətlərinin genişləndirilməsi üçün birgə işlər görəcəklər.

Çıxışlardan sonra görüş qarşılıqlı müzakirələr əsasında davam edib.

 Görüşün yekunu olaraq Agentliyin adından nümayəndə heyətinə xatirə hədiyyəsi təqdim edilib.