Bakıda "Nə? Harada? Nə zaman?" intellektual oyunu keçirilib
“Atəşgah” İntellektual Oyunlar Klubunun icra etdiyi "Nə? Harada? Nə zaman?" intellektual oyun layihəsi başa çatıb.
Layihə çərçivəsində VII Azərbaycan Çempionatının final mərasimi keçirilib.
“Atəşgah” İntellektual Oyunlar Klubunun prezidenti İlkin Yetirmişli bildirib ki, layihənin məqsədi ölkəmizdə intellektual hərəkatı daha da genişləndirmək, gənclərin asudə vaxtını səmərəli və faydalı şəkildə təşkil etmək, eyni zamanda onların bilik və bacarıqlarını inkişaf etdirməyə kömək etməkdir.
Layihə çərçivəsində keçirilən çempionatda paytaxtdan 30 ən güclü komanda ərizə ilə müraciət edərək seçilib. Komandalara 6 müstəqil müəllifin müxtəlif mövzulardan olan intellektual sualları təqdim edilib.
Çempionatın sonunda "Vendetta" komandası bütün rəqiblərini geridə qoyaraq, ilk dəfə Azərbaycan çempionu adını qazanıb. İkinci yeri "Revolver", üçüncü yeri isə "Prestij" komandası qazanıb.
Sonda qaliblər mükafatlandırılıb.
Layihənin donoru Qeyri-Hökumət Təşkilatlarına Dövlət Dəstəyi Agentliyidir.
