2024-cü ilin 21-22 oktyabr tarixlərində Cenevrədə BMT-nin Avropa İqtisadi Komissiyası (UNECE) və BMT-nin Avropa və Mərkəzi Asiya üzrə Qadın Regional Ofisi (ECARO) “Avropa İqtisadi Komissiyası regionunda gender bərabərliyinin sürətləndirilməsi üçün Pekin öhdəliklərinin 30 ilinə nəzər salınması” görüşlərini təşkil edib. 
Görüş çərçivəsində “Hökumətin rəqəmsal transformasiyası vasitəsilə kənd qadınlarının iqtisadi səlahiyyətlərinin artırılması” adlı yan tədbir keçirilib. 
“Gender Hub” İctimai Birliyinin həmtəsisçisi və icraçı direktoru, COP29 Təşkilat Komitəsinin üzvü Məryəm Məcidova UNECE və BMT Qadınların təşkil etdiyi “Pekin+30 Regional İcmal” toplantısında iştirak edib. Məryəm Məcidova çıxış edərək, regionda gender bərabərliyini irəli aparmaq üçün yerli təşəbbüslərin və əməkdaşlığın vacibliyini vurğulayıb, Pekin+30 çərçivəsində gənclərlə birgə işin, süni intellektdən istifadənin və qadınlara təsir edən iqlim dəyişmələri ilə bağlı proqramların vacibliyini qeyd edib. 
Görüşlər “Pekin Fəaliyyət Platforması”nın və 2030 Dayanıqlı İnkişaf Gündəliyinin həyata keçirilməsini artırmaq üçün prioritet tədbirləri və innovativ həlləri müəyyən edir və gender bərabərliyinə nail olmaqda tərəqqi və problemləri qiymətləndirmək üçün UNECE regionundan nazirləri, yüksək səviyyəli rəsmiləri və maraqlı tərəfləri bir araya gətirib. Keçirilən dəyirmi masalarda regionda gender bərabərliyi və qadınların səlahiyyətləndirilməsi məsələləri geniş müzakirə edilib, gender bərabərliyinin müasir dinamikası ilə bağlı əsas tendensiyalar, qadınların iqtisadi gücünü artırmaqla onların müstəqil qərarlar qəbul etməsi və bu yolla dinc, ədalətli və hər kəsin iştirak edə biləcəyi inklüziv cəmiyyətlərin qurulmasına töhfə vermək mövzuları diqqət mərkəzində olub.