"Elitar Gənc Biznesmenlər Mərkəzi” İctimai Birliyi “Kənd yerlərində gənclərin karyera və şəxsi inkişafına yardım” layihəsinin icrasına başlayıb.

8-9 iyun tarixlərində Göyçayda keçirilən təlimlərdə iştirakçılar üçün müxtəlif nəzəri və praktiki sessiyalar vasitəsilə karyera planlamasına yardım məqsədilə testlər və dəyərləndirmələr təşkil olunub, nəticələrə əsasən müvafiq məsləhətlər verilib. Oyunlar, qrup işləri təşkil olunub.

Layihənin məqsədi texnologiyanın inkişafı sayəsində lokal və qlobal əmək bazarına daxil olan yeni peşələrin region gəncləri arasında tanıdılması, onların həmin peşələrə uyğunluğunun ölçülməsi, eləcə də iş axtarma, əmək bazarında layiqli mövqe tutmaya yönəlmiş karyera məsləhəti xidmətinin göstərilməsidir.

Layihə çərçivəsində növbəti təlimlərin Qəbələ və İsmayıllı rayonlarında keçirilməsi planlaşdırılır.

Layihənin donoru Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyidir.