Türkiyədə "Zəngəzur sənətkarlığı" adlı sərgi keçirilib
Tətbiqi Sənət Nümunələrinin Qorunmasına və Təbliğinə Yardım İctimai Birliyi "Zəngəzur sənətkarlığı" layihəsinin icrasını davam etdirir.
Layihə çərçivəsində İstanbulun Üsküdar Bələdiyyəsinin "Validə Sultan" gəmisində "Zəngəzur sənətkarlığı" adlı sərgi keçirilib.
İctimai Birliyin sədri Lalə Sərdarlı bildirib ki, layihənin məqsədi Qərbi Azərbaycanın azərbaycanlılara məxsus, o cümlədən Türk dünyasının ortaq mədəni irsinin inciləri sayılan tarixi memarlıq abidələri, zəngin mədəni irs incilərinin elementlərini özündə ehtiva edən dekorativ tətbiqi sənət nümunələrinin hazırlanması və təbliği, eləcə də Türkiyədə tanıdılmasıdır.
Layihə çərçivəsində daha bir tədbir avqust ayında icra olunacaq.
Layihənin donoru Qeyri-Hökumət Təşkilatlarına Dövlət Dəstəyi Agentliyidir.
