"Paralimpiya idman növlərinin təbliğatı" adlı layihə başa çatıb
"Arabaçı Əlillər Şəbəkəsi" İctimai Birliyi tərəfindən icra edilən "Paralimpiya idman növlərinin təbliğatı" adlı layihə yekunlaşıb.
Layihə çərçivəsində fiziki məhdudiyyətli şəxslərin Peşə-əmək Reabilitasiya Mərkəzində tədbirlər keçirilib.
İctimai Birliyin sədri Ruhin Cəfərov bildirib ki, layihənin məqsədi əlilliyi olan şəxslər arasında paralimpiya idman növlərini təbliğ etmək, onların cəmiyyətə inteqrasiyasına dəstək olmaqdır.
Tədbirlər zamanı 100-ə yaxın fiziki məhdudiyyətli şəxsə paralimpiya idman növləri haqqında məlumat verilib, "Paralimpiya idman növləri", "Əlilliyi olan şəxslərin cəmiyyətə inteqrasiya üsulları" və digər mövzularla çıxışlar edilib. İştirakçılar paralimpiya idman növləri və bəzi abilimpiya oyunları ilə də əyani tanış olublar. Eşitmə və nitq qabiliyyəti məhdud iştirakçı şəxslər üçün çıxışlar jest dilində tərcümə edilib.
Layihənin yekununda iştirakçılara sertifikatlar təqdim edilib.
Layihənin donoru Qeyri-Hökumət Təşkilatlarına Dövlət Dəstəyi Agentliyidir.
