Naxçıvanda “Könüllülük pedaqogikasının öyrənilməsi” adlı layihənin icrasına başlanılıb
“Estafet” Gənclərin İctimai Birliyi “Könüllülük pedaqogikasının öyrənilməsi” layihəsinin icrasına başlayıb.
2024-cü il sentyabrın 13-də Naxçıvan Gənclər Mərkəzində layihənin açılış tədbiri keçirilib.
İctimai Birliyin sədri Tural Məmmədzadə bildirib ki, layihənin məqsədi gənclərin məlumatlılığının artırılması, könüllülük fəaliyyəti həyata keçirən qurumları və ali təhsil müəssisələrini bir araya gətirərək bu sahəyə elmi cəhətdən töhfə verməkdir.
Açılış tədbirindən sonra "Gənclərin könüllülükdə iştirakının motivasiya əsasları və pedaqoji əhəmiyyəti", "Könüllü fəaliyyətin əsas kateqoriyalarının pedaqoji şərhi" mövzularında seminar keçirilib. Seminarda 50 nəfər gənc iştirak edib.
Qeyd edək ki, Azərbaycanda könüllülük pedaqogikasının öyrədilməsini hədəfləyən layihə 2 ay ərzində Naxçıvan şəhərində baş tutacaq və muxtar respublika gənclərini, könüllüləri əhatə edəcək. Layihə çərçivəsində 5 seminar və "Könüllülük: cəmiyyəti təkmilləşdirmək, özümüzü inkişaf etdirmək" mövzusunda konfrans həyata keçiriləcək. Layihə ümumilikdə 680 nəfər gənci əhatə edəcək.
Layihənin donoru Qeyri-Hökumət Təşkilatlarına Dövlət Dəstəyi Agentliyidir.
